عراقيين
احنه بكلشي معروفين
عكس الناس لوجسهه الالم مرات نصبر عالالم ماناخذ بروفين
احنه اهل الشرف لوصاح تلكانه بدمانه لخاطره مطوفين
احنه الماعلينه اشكال احنه اصل البشر من ساعة التكوين
نزل لتكول عني بلعراقي
وتعال اوياي واحجي بلعراقي
امس عباس جفه بلعراقي
وكمت للموت ماكلت اشعليه
دورنه اعله كيفك كل ضلع مكسور
تلكه اسم الوطن محفور ايمان وعقيده ودين
بس يابس اذا كتلك امس صار الوكت سجين
حز ركبة خيال الضيف بس ظلينه اله امشرعين
ومدينه الحيا افراشات للخطار وبباب المضايف صرنه اله معزبين
وبس يابس اذا كتلك علينه اسنين
مرن مرت المنشار واحنه الهن خلك ميتين
مرينه بظرف سموه حصار وجان
بس تحجي الصدك تنباك منك ورقة التموين
وحطو بس فصم وحجار واذره وكالو النه طحين
وكالو عالشعير يعالج القالون والحنطه اطلعت ممنوعه عالمسكين
وصدكنه وعجنه وكمنه للتنور افواه وارانب جنه ملتمين
ومن طلعت الخبزه وداعتك حته الجوع
صاح استغفر الله الخبزه طلعت طين
وكلنه تهون يابويه وعساهه تهون
وجنه اعله البطون بحجر متحزمين
وعدنه اطفال جانو هاكثر حلوين..جانو كلش مكيفين
جانو بالكتب يلكون صوره لبرتقاله بنص البساتين
بابه نريد لو نص برتقاله تجيب كالو كلهه فيتامين
واركض من فشلتي لسوكنه المسكوف
وارجع بالدرب والكاهم متانين
هابابه شجبت وياك كلش ماجبت وياي بابه الوادم معزلين
واخجل من جذبتي الحللاهه العوز واكفر بالفكر جي ما يعز الزين
وطيهم حشف مطبوخ حايل من زمان الخير
واقنعهم وكلهم تين
بس ياتين
عراقيين
عدنه الحب حلاته الموت يعني الدين
يعني اسمك علي ومحلاك لوجدك محمد واسم ابوك حسين
يعني انت من اهل صفين
يعني انت العراقي الشرف التاريخ
يعني انت الحقيقه المارضت تنباك والجيم التحل كل سين
يعني انت الامس شعلان حط عمره اعله فاله بثورة العشرين
ترضه اشلون انشدك عن ضميرك وين
بس شكد هظيمه تشوف مسبيه وتدير العين